Oleh Pdt. Kolmalei Kol Manimabi Pelayan GMIT Jemaat Ebenhazer Bikoen Klasis Amarasi Timur
(Dibacakan pada malam puji-pujian dan kreatifitas Konven Pendeta GMIT Teritori Kudasemau, 23 September 2026 di Nekamese Eco Park)
Beta su sampe di titik ini Tuhan. Banyak aer mata gugur. Sapu-sapu dada, tarek-tarek napas. Kenyataan memang bikin jantong mo talepas.
Beta mau jadi pelayan Tuhan. Dari kecil ini su jadi cita-cita. Jatuh badiri, jatuh balari. Beta tahan luka deng duri, biar sandiri beta tahan.
Beta son akan lupa. Karingat cinta dari bapa, banting tulang tiap hari. Kasih jiwa deng raga. Beta tau baptua pung nazar, sambayang jadi napas. Samua demi dia lia beta badiri di mimbar pake toga.
Beta masih ingat mama pung nasehat di meja makan. Jang iko orang, idop iko firman. S’lalu andalkan yang di Atas. musti kuat karena di luar sana ikan makan ikan. Balajar pintar-pintar, angka orang tua pung muka pi atas.
Batul-batul son gampang Tuhan sampe di sini. Penantian panjang, perjalanan penuh deng duri-duri. Banyak kehilangan harus beta hadapi. Sakit tapi beta harus jalani.
Orang bilang katong ini rumah kaca, tempat orang berkaca. Bikin salah orang baca, dong timbang salah pake neraca. Musti jadi teladan, Kalo langgar aturan dapat kucak. Dapa luka tapi bikin bae. Jaga itu kaca, jang sampe pica.
Banyak yang terpanggil, sedikit yang terpilih. Dunia punya adil. Tuhan punya adil.
Yakini apa yang lu pilih. Datang kar’na panggilan, bajalan kar’na panggilan, maknai pergumulan. Mau patah hati, mau setengah mati, hadapi dengan nyali petarung.
Hari ini, bedak seorang janda lebih tebal dari iman seorang duda. Hari ini daki di badan seorang atoni pah meto lebih tebal dari kejujuran para pelayan.
TUHAN YESUS . . .
Terima kasih untuk toga itam yang beta pake. Beta lia ini toga beta pikir: pasti beta penuh wibawa dan akan gagah. Dan su pasti jemaat son akan bisaa melawan, kar’na dong selalu butuh be pung kehadiran.
Dulu beta lia ini toga itam sebagai kesempatan untuk beta bisa dapa kuasa. Dan kalo be omong satu dua kata, pasti semu orang akan tondok ko dengar.
Ternyata beta salah. Ini toga itam tanda menghamba. Bukan supaya beta dapa wibawa untuk disembah, namun turun merendah setara tanah, sama rata deng tanah. Ini toga suruh beta turun, turun dari ego, turun dari kursi yang bikin beta lupa diri.
Ini toga membalik logika, son ada takhta untuk diduduki, di kursi singgasana. Yang ada hanya kaki untuk berdiri, tangan untuk bekerja, hati untuk melayani dan lutut untuk berdoa. Beta sadar, son gampang menjadi seorang abdi. Apalagi disebut kawan sekerja-Nya.
Tuhan, katong banya dosa, banya yang kurang. Tiap nama, tiap orang adalah harapan tiap keluarga. Ada yang su kehilangan mama, bapa, anak, yang kehilangan pasangan hidup. Ada yang datang gareja sambi sambunyi dia pung aer mata.
Son gampang Tuhan. Tiap orang saribu kisah. Sekian galisah yang sesak di dada waktu malam. Kasih inga katong ko balajar jadi garam.
Maka kasih beta kekuatan Tuhan, kasih kekuatan. Mampukan beta ko melayani dari kata sampe perbuatan. Maka kasi beta kesempatan Tuhan, kasih kesempatan. Layakkan beta ko jadi berkat. Tuntun beta di perempatan.
Maka kasi beta hikmat Tuhan, kasi terang langkah-langkah. Hati talalu malam, tolong ko kasih hilang samua sangka-sangka. Maka kasih beta kejujuran Tuhan, buka beta pung mata perasaan.
Banyak dilema banyak masalah, tolong jang pernah lapas tangan. Maka kasih beta kesabaran Tuhan, dunia penuh amarah. Baku maki, baku pukul, baku kasih jatoh, ego tinggi macam manara. Satu persoalan abis, saatu persoalan datang, puku beta deng kenyataan-kenyataan. Mo makan pikir cinta, mo cinta pikir makan. Tenggelam dalam keadaan.
Maka kasi beta Roh Kudus, Tuhan talalu banyak setan-setan. Godaan muncul di mana-mana, bahkan dari toga yang beta pake. Daging mandidih di mana-mana, doi kasih panas tangan-tangan. Beta lemah Tuhan, pegang beta deng Amsal supaya beta jang ilang jalan.
Maka kasi beta nurani Tuhan. Dunia penuh tirani, kepentingan.
Beta musti jadi kebenaran. Tarek beta waktu salah, tampar beta kuat-kuat dalam kepahitan. Beta manusia biasa Tuhan, buka malaikat yang punya jabatan. Maka kasi beta cinta Tuhan, dunia penuh deng luka-luka. Beta mau sentuh orang lain deng kasih sayang, den Injil. Maka kasi beta cinta Tuhan, beta mau hibur duka-duka. Kebenaran yang beta yakini, cinta kasih genap bukan ganjil.
Maka jang kasih beta jbatan tinggi, kalo hati masih suka rendahkan orang. Apa gunanya katong pake toga, kalo katong lupa cara membungkuk?
Kasi katong nyali Tuhan, sebab dunia butuh keberanian. Bukan banyak jalan menuju ke Roma, tetapi saatu jalan menuju rumah. Katong akan maknai semua kesakitan dan kesepian-kesepian. Katong parcaya dalam galap ada cahaya, api injil tetap manyala.
Tuhan, beta mohon. Kasih mampu beta untuk jadi hamba-Mu. Supaya beta jaga ini sikap dan kata-kata dalam pelayanan. Jaga beta pung hati sebagai kawan sekerja-Mu. Ya, kawan sekerja-Mu. Supaya bukan saja beta bekerja di rumah Tuhan, tetapi bekerja bersama-Mu, Tuhan, Sahabatku
(dari seorang abdi dan kawan sekerja-Nya di Bikoen)
#KonvenKudasemauPdtGMIT
Editor: Pdt yft hb